Buwan ng Wikang Pambansa 2015

Buwan ng Wikang Pambansa 2015

Tema: Filipino: Wika ng Pambansang Kaunlaran 


Mga Timpalak

GAWAD KWF SA SANAYSAY 2015

MGA TUNTUNIN

1. Ang Gawad KWF sa Sanaysay ay bukás sa lahat maliban sa mga kawani ng KWF at kanilang kaanak.

2. Ang lahok ay dapat tumalakay sa temang Filipino: Wika ng Pambansang Kaunlaran. Inaasahan din na may angkop itong talababa at listahan ng sanggunian.

3. Kailangang nasusulat sa Filipino ang lahok, orihinal, hindi pa nailalathala at hindi rin salin sa ibang wika. Marapat na hindi ito magkukulang sa 15 pahina at hindi rin sosobra sa 30.   

4. Sapagkat gabay ang pananaliksik, marapat ang paggamit at pagbanggit ng sanggunian sa pormang MMP (KWF Manwal sa Masinop na Pagsulat) sa mga talababa, atbp. 

5. Ang lahok ay kailangang may apat (4) na kopyang makinilyado o kompiyuterisado (Font-12, Arial), may dobleng espasyo at isang pulgadang palugit sa bawat gilid na nakaimprenta sa short bond paper (8 ½ x 11 pulgada).

6. Ang soft copy ng lahok ay kailangang ilagay sa isang compact disc (CD). Kinakailangang magtaglay lamang ng sagisag-panulat (pen name) at hindi tunay na pangalan ng kalahok ang dokumento sa soft copy man o sa nakaimprentang kopya.

7. Hindi patatawarin ang sino mang mahuhuli at mapapatunayang nangopya. Kakanselahin ng KWF ang ipinagwaging lahok nito sa timpalak at hindi na muling makasasali pa sa alinmang timpalak ng KWF.

8. Anumang pasiya ng Lupon ng Inampalan ay pinal at hindi na maipaghahabol. Lahat ng lahok, nanalo man o  natalo, ay hindi na ibabalik sa mga kalahok at angkin ng KWF ang karapatang mailathala ang mga nagwaging lahok nang walang royalty sa mga may-akda.   

9. Isang selyadong No. 10 envelope na maglalaman ng hiwalay na pormularyo sa paglahok para sa buong detalye ng may-akda (maaaring i-download sa www.kwf.gov.ph) kasama ang dalawang retrato (2x2) at maikling biodata. 

10. Ipadala ang lahok (na may apat na kopya), pormularyo ng aplikasyon na may kalakip na larawan ng may akda at CD sa:                                            

                                                Lupon sa Timpalak 2015                                           

                                                Komisyon sa Wikang Filipino                                                 

                                                2F Watson Bldg., 1610 JP Laurel St.,                                               

                                                San Miguel, Manila 1005      

Hanggang 3 Hulyo 2015, 5:00 nh lamang ang pagtanggap ng mga lahok. Hindi tatanggapin ang mga ipinasa sa pamamagitan ng email.

Para sa kaukulang tanong,  tumawag sa (02) 736- 2524; 736-2519 at hanapin si Roy Rene Cagalingan. Bisitahin rin ang www.kwf.gov.ph para sa karagdagang impormasyon.  

GAWAD DANGAL NG WIKANG FILIPINO 2015

MGA TUNTUNIN

Bukás na ang nominasyon para sa lahat ng indibidwal, samahan, tanggapan o institusyon, at mga ahensiyang pampamahalaan o pribado na may natatanging ambag o nagawa tungo sa pagsusulong, pagpapalaganap, pagpapayabong, at preserbasyon ng wikang Filipino.

Ang mga indibidwal na nabanggit dapat nakapagpamalas ng mahusay na paggamit ng wikang Filipino sa kanilang mga tuklas at pananaliksik, mga programa at serbisyong naitaguyod, o anumang produksiyon at likha.

Hanggang 3 Hulyo 2015, 5:00 nh lamang ang pagtanggap ng mga nominasyon. Hindi tatanggapin ang mga nominasyon na ipinadala sa pamamagitan ng email o fax.

1.         Marapat na dumaan sa rekomendasyon ang nominadong entidad. Maaaring isang samahan, tanggapan, institusyon o indibidwal ang magpasok o magharap ng kanilang nominado. I-download ang pormularyo ng nominasyon sa KWF website, www.kwf.gov.ph.

2.         Kasama ang pormularyo ng nominasyon, ang nag-eendoso ay kinakailangang maglakip ng anumang credential o katibayan na magpapatotoo sa lawas ng paggawa ng iminumungkahing nominado kahit sa loob lamang ng nakalipas na tatlong (3) taon.

3.         Mananatiling kompidensyal sa Lupon ng Gawad ang lahat ng nominasyon. Dadaan ang mga nasabing nominasyon sa proseso ng deliberasyon at ang mga desisyon ay pinal at hindi maipaghahabol.

4.         Ipadala sa koreo o nang personal ang nasagutang pormularyo sa nominasyon, credentials (o iba pang katibayan) sa:

                                    Lupon sa Gawad

                                    Komisyon sa Wikang Filipino

                                    Gusaling Watson, 1610 Daang JP Laurel,

                                    San Miguel, Maynila

Makipag-ugnayan kay Roy Rene Cagalingan ng Sangay ng Edukasyon at Networking sa 736-2524, 736-2525 o 736-2519 para sa mga paglilinaw at iba pang impormasyon

ULIRANG GURO SA FILIPINO 2015

MGA TUNTUNIN

Ang Ulirang Guro sa Filipino ang taunang gawad na ibinibigay ng Komisyon sa Wikang Filipino sa mga pilî at karapat-dapat na guro sa Filipino sa kahit anong antas ng edukasyon sa bawat rehiyon.

Hinahangad ng tanggapan na makilala at maipagparangalan ang mga natatanging guro sa Filipino na nagpamalas ng angking husay, talino, at dedikasyon sa pagpapalaganap at promosyon ng wikang Filipino at/o mga wika at kultura sa kanilang komunidad.

1. Bukás ang timpalak sa mga guro sa Filipino, maliban sa mga kawani ng KWF at mga direktor ng Sentro ng Wika at Kultura (SWK), at kanilang mga kaanak hanggang ikalawang digri (degree).

2. Ang mga nominado ay kinakailangang magtaglay ng mga sumusunod na katangian:

            a. May hawak na kaukulang lisensiya (LET, atbp.), full-time at permanenteng status.

            b. Nakapaglingkod nang tatlo o higit pang taon bílang guro ng Filipino o mga kaugnay na disiplina na ang gamit ay Filipino bílang wikang panturo sa anumang antas ng edukasyon at may antas ng kahusayan (performance rating) na hindi bababa sa Very Satisfactory sa buong panahon ng paglilingkod.

            c.Nakapag-ambag sa pagpapalaganap ng wikang Filipino sa rehiyon sa pamamagitan ng pananaliksik, publikasyon, seminar, pagsasanay, palihan, at iba pang katulad na aktibidad.

            d. Nanguna sa pagpapahalaga sa pamanang pangwika at pangkultura ng Filipinas kaagapay ng pagtaguyod at pagpapaunlad sa wikang Filipino.

            e. Nakatanggap ng parangal at/o iba pang gawad kaugnay sa kaniyang propesyon (opsiyonal).

            f. Rekomendasyon mula sa immediate superior ng kaniyang paaralan na nagpapatunay ng kagalingan bílang guro sa Filipino na may makabansa at makataong kamalayan.

3. Maaaring magpása ang paaralan ng higit sa isang nominasyon. Ang bawat nominasyon ay kailangang mailakip sa isang long brown envelope na maglalaman ng sumusunod:

            a. pormularyo para sa nominasyon;

            b. rekomendasyon ng immediate superior ng paaralan; at

            c. folio ng mga katibayan ng pagkilala, gawad, publikasyon, at mga naisagawang seminar, palihan, at mga proyektong may kaugnayan sa wika at kultura.

4. Maaaring ipadala sa tanggapan ng Sentro ng Wika at Kultura (SWK) sa inyong probinsiya/rehiyon ang mga nominasyon. Ang hulíng araw ng pagpapadala ay sa 3 Hulyo 2015, 5 nh. Hindi na mauurong ang araw ng pagsusumite. Ang mga lahok na ipinadala sa pamamagitan ng koreo ay kailangang matanggap ng mga SWK nang hindi lalampas sa petsang nabanggit.

5. Makatatanggap ng medalya at katibayan ng pagkilala ang mga mapipiling Ulirang Guro sa Filipino.

6. Ang pasiya ng inampalan ay pinal at hindi na mababago. Lahat ng lahok, nanalo man o natalo, ay hindi na ibabalik ng KWF.

Para sa karagdagang detalye, tumawag sa Sangay ng Edukasyon at Networking (SEN) sa 736-2519.